David Silva do të largohet nga Manchester City sezonin e ardhshëm, ky vendim ka kohë që është publikuar, por fantazisti spanjoll ka dashur që ta sqarojë situatën.
33-vjeçari, që është pjesë e Citizens që nga viti 2010, kur u transferua nga Valencia, deklaroi se për të ishte një vendim i vështirë, pasi luan për këto ngjyra prej një kohe të gjatë, por çdo gjë e bukur e ka një fund. Ai theksoi se dëshiron të largohet në nivele të larta, duke lënë kujtime të bukura.
“Natyrisht që është shumë e vështirë të largohesh pas kaq shumë vitesh. Kam kaluar shumë kohë të bukura këtu, por çdo gjë e bukur e ka një fund.
Unë dua që ta mbyll në këtë mënyrë, duke luajtur në nivele të larta. Ekipi po përmisohet çdo vit më shumë, dhe për mua do të ishte e vështirë të mbajë ritmin e lojtarëve më të rinj.
Prandaj kam vendosur që të mbyll në këtë mënyrë. Dhe jam shumë i kënaqu me atë që kam arritur gjatë qëndrimit tim këtu”, përfundoi Silva.
