Marc Marquez spektakolar. Piloti spanjoll i Honda koleksionoi në Misano, në Çmimin e Madh të San Marinos, fitoren e shtatë sezonale, çka e afron edhe më shumë me triumfin përfundimtar në MotoGP.
Marquez i mohoi fitoren e parë sezonale francezit Fabio Quartararo, i cili udhëhoqi thuajse gjatë gjithë garës, për t’u parakaluar nga spanjolli pikërisht në xhiron e fundit. U ngjit në podium edhe Maverick Vinales, në vendin e tretë, duke lënë pas shokun e skuadrës Valentino Rossi. Mbërriti i pesti në finish Franco Morbidelli, që i parapriu Andrea Doviziosos.
Në renditjen e përgjithshme Marc Marquez (275 pikë) thellon diferencën me ndjekësin më të afërt, Dovizioso (182 pikë). Sa u përket skuadrave, Honda kryeson me 281 pikë, e ndjekur nga Ducati me 221 pikë e Yamaha me 215 pikë.
