Tri ditë pas incidenteve në derbin Tirana-Partizani dhe veçanërisht pas deklaratës së presidentit të bardhebluve, Refik Halili, se në sektorin e tifozëve të kuq janë dëmtuar 180 stola, dje janë parë në ambientet e stadiumit “Selman Stërmasi” zyrtarë të kampionëve në fuqi.
“Panorama Sport” mëson se pak orë para se të niste takimi mes Tiranës dhe Shënkollit, që u luajt pa praninë e tifozëve, përfaqësuesit e Partizanit me një bllok në dorë dhe aparat fotografik, kanë verifikuar të gjitha dëmet në tribunat H1 dhe H2, ku qëndruan “Ultras Guerrils”.
Ashtu siç ka ndodhur edhe më parë, duke bërë përllogaritjen për stolat e dëmtuar, klubi i Partizanit do të dëmshpërblejë Tiranën për atë që ndodhi.
