I pranishëm në konferencën e sotme për shtyp, mbrojtësi i Kombëtares, Berat Gjimshiti u shpreh tepër optimist në lidhje me 2 përballjet që kuqezinjtë do të zhvillojnë ndaj Turqisë dhe Moldavisë. Futbollisti i cili aktivizohet tek Atalanta në Serinë A beson se skuadra i ka shanset për të triumfuar.
Përgatitjet ndaj Turqisë dhe dëmtimi i Hysajt…
I kemi 2 ndeshje shumë të vështira, sidomos kundër Turqisë. Besoj se kemi shanse të vërteta. Në ndeshjen e kaluar kemi bërë gabime individuale. Do ta shikojmë si një shans të ri dhe do të japim maksimumin. Më vjen keq për Hysajn që u lëndua para Kombëtares, ishte dhe kapiten kur nuk ishte Mërgimi. Besoj do na mungojë, do luajmë edhe për Elsin.
Më shumë përgjegjësi…
Kam më shumë se 5 vite që jam këtu. Kam bërë eksperienca të mira dhe të këqija. Do të marr përgjegjësi më të madhe. Do shikojmë përpara.
Diferenca mes skuadrave…
U pa dhe në ndeshjen e fundit me Islandës që u ndryshua diçka. Luajmë më të sigurt. Ka pasur shumë ndryshime në skuadër, jemi mirë me sistemin e ri që luan trajneri Reja. Mund të kemi një shans të vërtetë.
Momenti më i bukur në karrierë…
Mund të them që është një moment shumë i bukur. Gjërat që i kemi arritur me Atalantën dua t’i bëj edhe me Kombëtaren. Vetëbesimin që e kam te Atalanta dua ta transmetoj edhe këtu në ekipin Kombëtar.
Lojtarët e afruar rishtazi…
Sigurisht që janë gati. Bare ka luajtur shumë mirë. Seferin gjithashtu. E kanë përvojën për të luajtur, do ta kenë shansin për ta treguar veten. Do jetë një shans i vërtetë.