Trajneri i Tiranës, Ardian Mema, doli ditën e sotme para mediave në konferencën për shtyp, në vigjilje të sfidës që ekipi i tij luan nesër në transfertë ndaj Bylisit.
Mema e vlerësoi maksimalisht Bylisin, teksa deklaroi se në Ballsh për të marrë fitoren do i duhet shumë djersë ekipit të tij, ndërsa komentoi edhe zërat për largim, e dha edhe një “recetë” për titullin kampion.
JASHTË FUSHE – Të gjitha ndeshjet janë njëlloj, brenda e jashtë. Tani ka kushte të mira, mund të luash sepse janë fushë të mira. Pra dalin në pah cilësitë. Në Ballsh kanë fushë të mirë dhe në lë të luajmë dhe të tregojmë vlerat tona. Nuk ka të bëjë fjala transfertë. Me rëndësi është që të bëjmë punën si duhet.
ECURIA JO POZITIVE – E kam sqaruar edhe më përpara. Ishte fat i keq në Vlorë, nuk e justifikoj as veten dhe lojtarët. Fati është pjesë e lojës. Ekipi ka vlera, mban topin, krijon raste. Kemi pësuar disa gola, që nuk duhej. Me Kukësin kemi pësuar gola të merituar nga kundërshtari. Ka keqardhje për pikët e lëna në Vlorë. Kampionati është i tillë. Ne kemi luajtur mirë me pjesën më të madhe të skuadrave. Futbolli nuk të fal po humbe përqendrimin.
ZËRAT PËR LARGIM – Ndoshta pritshmëritë janë të mëdha, pritet që të fitohet pafundësisht. Mund të kesh moment delikat në kampionat kur nuk të ecin punët. Ndodh edhe kjo. Gjëra të rëndomta që ndodhin në Shqipëri janë edhe këto. Nuk jam i pari që bie pre e thashethemeve, e kanë provuar kudo në gjithë futbollin tonë shumë trajnerë. Vjet ishte prova ime. Loja është fytyra e një trajneri. Ndaj edhe rinovuam kontratën. Pres të jemi në tre ekipet e para. Duhet t’i shohim dhe t’i themi gjërat tamam, siç janë. Ajo periudhë iku, por mund të rikthehet. Jemi vend i vogël dhe një fjalë e një njeriu me peshë mjafton që të nisin parashikimet. Në punë më mbajnë rezultatet, asgjë tjetër.
RIVALËT – Pesë ekipe janë shumë të forta. Ne, Teuta, Kukësi, Partizani dhe Skënderbeu. Edhe Laçi është ekip shumë i fortë, edhe pse fituam. Kanë lojtarë të mirë. Këto do jenë ekipet më të cilat do rivalizojmë. Do jemi në garë deri në fund me këto ekipe. Harrova edhe Bylisin, që është një ekip me përbërje shumë të mirë. Janë lojtarë që kanë shumë dëshirë dhe mendoj se çdo ekip që do të luajë atje do të ketë probleme. Ata të nxjerrin probleme dhe t’i fitojnë ndeshjet. Kanë shumë dëshirë dhe personalitet. Japin gjithçka për të fituar. Kemi pasur pak ditë për ta përgatitur. Duhet të shkojmë në Ballsh për të bërë më të mirën tonë, të marrim rezultat pozitiv. Duhet shumë punë dhe djersë për të fituar.
TRE TRANSFERTA – Të tria ndeshjet janë shumë të rëndësishme. Nëse i kalojmë këto, do dalin tre të tjera. Duhet të shohim ndeshjen e radhës dhe ta menaxhojmë si duhet, për të kapur rezultate pozitive. Kjo të sjell mundësi të ngjitet ekipi.
GABIMET NË MBROJTJE – Nuk është njëlloj si vjet. Kundërshtarët na sulmojnë dhe me cilësitë e tyre mundet të na shënojnë. Vjet kemi falur vetë, s’kishte nevojë të na sulmonte kundërshtari.
TITULLI – Nuk na mungojnë cilësitë për të dalë kampionë. Duhet menaxhim dhe të jemi të thjeshtë. Nuk dilet kampion po të bësh vetëm dy orë stërvitje. Thjeshtësia do na bëjë të qëndrojmë lart dhe të dalim kampion. Nuk më pëlqyen disa lojtarë që dolën nëpër media pas 4 ndeshjesh. U duk sikur kishim dalë kampion. Motivimi duhet të jetë gjithmonë brenda grupit, por jo euforia.
