Dëmtimet janë kthyer në një problem serioz për Interin këtë sezon, teksa disa nga lojtarët kryesorë të ekipit janë detyruar të qëndrojnë jashtë, për shkak të problemeve me lëndimet.
Lojtari i fundit që ka shfaqur probleme me dëmtimet në kampin zikaltër, është mbrojtësi i talentuar Alesandro Bastoni. Futbollisti 20-vjeçar ka pësuar një dëmtim në ndeshjen e fundit kundër Veronës, e cila u fitua nga Interi me rezultatin 2-1.
Nëpërmjet një komunikate në faqen zyrtare, klubi zikaltër njofton se mbrojtësi ka pësuar një dëmtim në këmbën e majtë në fundjavë, dhe për këtë arsye ka braktisur grumbullimin me kombëtaren e Italisë së 21-vjeçarëve, dhe është rikthyer përsëri në Milano, për të vazhduar rikuperimin.
Megjithatë nuk është një dëmtim shumë i madh, por për të shmangur problemet më të mëdha, klubi zikaltër ka vendosur që lojtari të vazhdojë një program të veçantë për tu rikuperuar.
