Keisuke Honda tashmë ka gjetur ekipin ku do të vazhdojë karrierën e tij futbollistike, teksa ka firmosur me ekipin e ri.
Prej disa kohësh sulmuesi japonez ishte në kërkim të një skuadre, pasi kishte mbyllur aventurën me Melburn Viktori ku u aktivizua në sezonin e fundit. Nëpërmjet disa postimeve në “Twitter”, futbollisti i ishte vetofruar Junajtid dhe Milanit, për ta marrë në ekipet e tyre.
Megjithatë asnjë nga këto skuadra nuk e kontaktuan lojtarin, i cili u hodh në kërkim të një ekipi tjetër. Vetëm pak ditë më parë, Honda komunikoi se ishte në provë te skuadra holandeze e Viteshes.
Pas disa ditëve në stërvitje me këtë ekip, stafi drejtues janë bindur me formën e lojtarit dhe vendosën t’i ofrojnë atij kontratën. Kontrata e firmosur do ta mbajë atë të lidhur me klubin holandez deri në fund të sezonit, dhe në rast se bind me paraqitjet e tij, mund ta rinovojë edhe për një vit tjetër.
