TIRANE-Sonte në orën 20:45 kombëtarja shqiptare e futbollit do të inaugurojë stadiumin e ri përballë kampionëve të botës, sfidë që mbyll edhe ndeshjet në grupin ‘H’ të eliminatoreve.
Kuqezinjtë nuk do të kenë presion e rezultatit, pasi shpresat për kualifikim u shuan që në Turqi, por sonte do të tentojnë që ta nisin me këmbën e mbarë në stadiumin e ri. Por, 90′ nuk do të jenë të lehta, kur mendon se përballë do të jenë as më pak dhe as më shumë, por kampionët e botës.
Kryeministri i Shqipërisë Edi Rama vizitoi kombëtaren shqiptare të futbollit një ditë para debutimit në ‘’Air Albania Stadium’’ ndaj Francës. Stadiumi do të jetë plot, ndërsa do të inaugurohet me një ceremoni të veçantë me protagonistë këngëtarët Era Istrefi, Aurela Gaçe, Elvana Gjata, Flori Mumajesi, Juliana Pasha, si dhe nën masa të rrepta sigurie.