Vazhdon solidarizimet për Shqipërinë në këtë ditë tragjike, ku disa persona humbën jetën për shkak të lëkundjeve të fuqishme të tërmetit.
Nëpërmjet një postimi në faqen zyrtare, presidenti Armand Duka, bën me dije se ka marrë telefonata, mesazhe dhe propozime për ndihmë konkrete nga presidenti i UEFA-s, Aleksandër Ceferin, Zv.Presidenti Sandor Sanai, Presidenti i Federatës Italiane të Futbollit Gabriele Gravina, ish-trajnerët De Biazi, Panuçi, etj.
POSTIMI I DUKËS:
Miqtë e FSHF dhe Shqipërisë solidarizohen me ne, në këtë ditë të vështirë! Mora telefonata, mesazhe dhe propozime për ndihmë konkrete nga Presidenti i UEFA-s, Aleksander Čeferin, Zv/Presidenti Sándor Csányi, Presidenti i Federatës Italiane Gabriele Gravina, trajnerët De Biasi, Panucci, Reja e shumë miq të tjerë.
Biseda vëllazërore lidhur me situatën e krijuar nga tërmeti pata edhe me homologët e mi, Presidentin e Federatës së Futbollit të Kosovës Agim Ademi dhe Presidentin e Federatës së Futbollit të Maqedonisë së Veriut, Muamed Sejdini, të cilët shprehën solidaritetin dhe mbështetjen e tyre. Mirënjohje!