Patrik Kutrone u largua nga Milani në merkaton e verës, për të kaluar te anglezët e Uolves, ndonëse dëshira e madhe e futbollistit ishte të qëndronte te kuqezinjtë.
Sulmuesi italian e ka shprehur hapur dashurinë e tij për Milanin, për të cilët ka bërë tifo që nga fëmijëria. 21-vjeçari kishte edhe fatin të luante për ekipin e zemrës, megjithëse më vonë ishte i detyruar të largohej.
Pavarësisht se tashmë nuk luan për “Djallin”, Kutrone vazhdon të shfaqë dashurinë për këtë ekip hapur. Së fundmi italiani ka bërë një tatuazh në krahun e tij të djathtë. 
Ajo që bie menjëherë në sy, është se në tatuazh është lojtari me fanellën e Milanit, teksa poshtë është edhe data e debutimit të tij me këtë klub. 21 maj 2017, ishte pikërisht data kur Kutrone debutonte për ekipin e tij të zemrës, në ndeshjen kundër Bolonjës, teksa zëvendësoi Zherard Deulofeun.
