Ikona e futbollit italian Fabio Kanavaro shpreh dëshirën për të debutuar në futbollin europian si trajner.
Ish-“Topi i Artë” për vitin 2006 drejton aktualisht skuadrën kineze Guangzhou Evegrande, me të cilët ka arritur të shpallet kampion në shtetin e njohur aziatik. 46-vjeçari shpalosi hapur dëshirën për të drejtuar një skuadër të futbollit europian. Ish-mbrojtësi legjendar italian bëri krahasimin mes futbollit europian dhe atij kinez.
“Synimi im është të kthehem pas në Europë për të matur veten me më të mirët. Por, për këtë gjë duhet të jem gati dhe të fitojë eksperiencë. Aktualisht po bëj detyrën time. Kam marrë liçencën në B në Kinë dhe ndihmova ekipin të fitonte titullin.
Kina është një eksperiencë e jashtëzakonshme. Këtu futbolli është ndryshe, nuk ka të njëjtin intensitet dhe teknikë si në Europë”, deklaroi ish-lojtari i Napolit, Parmës, Interit, Juventusit dhe Real Madridit.
Kanavaro ka një eksperiencë si trajner në Azi. Ai konsiderohet njëri prej mbrojtësve më të mirë të futbollit botëror.
