Ish-futbollisti i Serisë A, Mateo Sereni fitoi pafajësinë pas 9 vitesh betejë në shkallët e gjyqësorit italian. Ish-portieri i Sampdorias, Lacios dhe Breshias u akuzua nga ish-bashkëshortja e tij Silvia Kantoro se ka abuzuar seksualisht me vajzën e tyre të vogël.
Në vitin 2015, Sereni u dënua me 9 vite për ‘’abuzim seksual me minorenë dhe marrëdhënie brenda familjes’’, por dy vite më vonë, gjykata e Torinos anuloi vendimin dhe e dërgoi për rishqyrtim.
Sot, Gjykata e Piemontit konstatoi se ‘’dëshmia e vajzës së vogël ka ngjallur dyshime se është marrë në mënyrë të papërshtatshme dhe se kujtimet e ish-gruas së Serenit, konsulentëve teknikë dhe të kriminalistikës mund të jenë mashtruese’’. Në këtë mënyrë, ‘’ferri’’ për Mateo Serenin mbaron pas 9 vitesh.
