Mesfushori kilian, Arturo Vidal duket se do me çdo kusht kalimin tek Interi në merkaton e janarit.
Ish-i i Juventusit dhe Bajernit i ka shpallur luftë Barcelonës me qëllim që të largohet dhe të vihet nën urdhrat e Kontes.
Siç raporton “ABC”, së fundmi Vidal ka rritur shumë tensionin ndaj katalanasve, pasi “mollë” e sherrit janë bërë disa bonuse në kontratën e tij. Ai ka marrë vetëm 1.7 milionë euro bonuse, teksa ai pretendon se duhet të kishte arkëtuar 4.1 milionë euro, vitin e shkuar.
Ky lajm që qarkulllon në media së fundmi, gëzon tej mase Interin dhe Antonio Konten, që e do me çdo kusht Vidalin në skuadër.
Edhe pse Valverde dhe Mesi e duan mesfushorin në ekip, klubi duket se nuk i ka shumë të mira marrëdhëniet me lojtarin. Kjo ishte krisja e dytë brenda muajt për kilianin, pasi ai u revoltua që nuk ishte titullar në derbin ndaj Realit të Madridit.