Trajneri i Kosovës Bernard Shaland i pranon të gjitha mundësitë për të vazhduar apo jo me Kosovën pas kampionatit europian të 2020.
Në një intervistë për “Epoka e Re”, 68-vjeçari zviceran shprehet se duhet të mendohet mirë për të ardhmen e tij pasi është në një moshë të madhe për të vazhduar për të stërvitur ekipe. Shaland u përqëndrua te harmonia që ekziston në kombëtare, e cila e bën të punojë i qetë dhe i gëzuar.
“Kualifikimi nuk është ëndërr vetëm për ekipin, por edhe për mua si trajner. Nuk e di të ardhmen time. Në vitin 2020 mbushi 69 vjeç dhe e di se sa energji duhesh të kesh për këtë detyrë. Ndoshta mund të jetë kampionati europian përfundimi i karrierës time. Kam mësuar në jetë që në shumë situata të mos planifikosh, sidomos në futboll, pasi është i paparashikueshëm.
Fokusi im është për ekipin dhe kualifikimet dhe jo për të ardhmen time, por ju duhet të jeni të sigurt se kam kënaqësi të madhe që jam pjesë e këtij ekipi. Ne po punojmë mirë së bashku, nganjëherë disa lojtarë nuk janë të lumtur kur nuk luajnë, por është normale. Skuadra është e bashkuar, e ndiej dëshirën e lojtarëve kur ata vijnë këtu për secilën ndeshje, kjo është e rëndësishme për mua. Do të jetë e rëndësishme për mua edhe në momentin kur dua të vazhdoj me Kosovën, ta përfundoj karrierën, apo të vazhdoj në ndonjë ekip tjetër”, përfundoi Shaland.