Kylian Mbappe është hapur për “heronjtë” e tij të fëmijërisë, duke zgjedhur trajnerin e Real Madridit, Zinedine Zidane, si idhullin më të madh, që ka pasur në fillim. 21-vjeçari është bërë një nga më të njohurit në futbollin botëror gjatë viteve të fundit. Tashmë është fitues i Kupës së Botës me Francën (2018) dhe i çdo trofeu të brendshëm me PSG. I lindur në vitin 1998 dhe rritur në Bondy, periferi e pafavorshme në veri-lindje të Parisit, Mbappe përkoi në fëmijërinë e tij me kohën kur Zidane ishte një superstar global.
I pyetur për futbollistët që admironte më shumë, teksa rritej, talenti francez tha: “Epo, unë kam pasur disa faza rritjeje. Si fëmijë kam adhuruar Zidane. Nëse je djalosh i ri dhe francez, idhulli juaj është patjetër Zidane. Më pas kam simpatizuar Cristiano Ronaldon, kam pasur fatin të takohesha atëherë me të. Erdhi një kohë kur kisha idhull brazilianin Ronaldo, për mënyrën se si ai luajti. Tashmë dua të lë atë lloj shenje, me vlerat e mia, si një mesazh në historinë e futbollit”.
