Skënderbeu ka zbritur në fushë ditën e sotme, teksa ekipi bardhekuq nën urdhrat e teknikut Ilir Daja, ka nisur përgatitjet në “Tropikal Resort “, në Durrës.
Klubi korçar po punon për të rregulluar grupin për dy fazat e mbetura, me trajnerin Daja që pret edhe afrime në ekip. Megjithatë përveç afrimeve, janë edhe tre lojtarë që trazojnë merkaton e Skënderbeut.
Bruno Dita, Bjaram Jashanica dhe Dejvi Bregu përfundojnë kontratat e tyre me Skënderbeun ne maj, dhe për këtë arsye drejtuesit e klubit nuk dëshirojnë të mbeten pa gjë nga këta futbollistë. Po punohet për shitjen e Bregut, nga i cili mund të kishte edhe më shumë fitime, duke parë edhe potencialin e sulmuesit.
Interes të veçantë për 24-vjeçarin ka pasur nga Zilina në Sllovaki, por një marrëveshje mes palëve nuk është arritur ende. Ndryshe nga Bregu, për Ditën dhe Jashanicën, interes ka pasur nga disa ekipe të Kategorisë Superiore, por edhe nga Maqedonia e Veriut.
Kujtojmë se mbrojtësit kosovar i përfundon dënimi 2-vjeçar për doping këtë muaj, dhe nga muaji i ardhshëm 29-vjeçari do të jetë i gatshëm të luajë.
