Champions League në Amerikën qendrore dhe veriore ka dhuruar shumë emocione mëngjesin e sotëm, sidomos në sfidën Tigres-Allianza. Luhej akti i dytë mes dy ekipeve, ku ndeshja e parë e luajtur në El Salvador, kishte përfunduar me suksesin e vendasve 2-1. Tashmë, luhej në Meksikë, ku Tigres ishte dukshëm favorit.
Pavarësisht se brenda 23 minutash vendasit udhëhiqnin 3-0, miqtë bënë një kthesë të pabesueshme, duke çuar shifrat në 3-2 përpara fundit të pjesës së parë. Në fund të ndeshjes erdhi edhe momenti më dramatik, ku Tigres arriti kualifikimin në minutën e fundit shtesë me një gol të shënuar nga portieri. Nahuel Guzman u shndërruar në hero, teksa shënoi me kokë, duke çmendur në festë ekipin dhe tifozët e tij për një kualifikim të paharrueshëm.
