Pas rastit pozitiv të Daniele Rugani në testin e “Coronavirus”, 121 persona, përfshirë lojtarët e Juventusit, anëtarët e stafit, menaxherët, shoqëruesit dhe punonjësit e klubit bardhezi janë duke kaluar një periudhë izolimi vullnetar në shtëpi, në përputhje me kërkesat e autoriteteve shëndetësore italiane, sipas dispozitave aktualisht në fuqi.
Shumë prej tyre janë karantinuar në shtëpi, disa në “J Hotel”, i cili rezervon një krah ekskluziv për ekipin e parë. Tani, hapi tjetër. Siç është raportuar nga “Gazzetta dello Sport”, lojtarët do t’i nënshtrohen testit brenda dy ditësh në lidhje me COVID-19. Kjo, për të parë gjendjen reale aktuale, pasi virusi ka një periudhë inkubacioni nga 5 deri në 8 ditë, por mund të zgjasë edhe deri në 14 ditë. Arsye kjo, pse skuadra u izolua në çast.
Tamponi do t’iu bëhet të gjithëve në shtëpi, padyshim, duke qenë se bardhezinjtë janë në karantinë. Marrja e rezultateve të analizës së “Coronavirus” do të zgjasë rreth 24 orë. Për momentin askush nuk ka treguar simptoma, por kjo nuk përjashton mundësinë e pasjes së infeksionit asimptomatik. Pas kësaj, lojtarët do të qëndrojnë na karatinë të vetmuar deri më 25 mars, më pas do të rinisin stërvitjen. Megjithatë, aktualisht, ende nuk është caktuar një datë kur do të dalin sërish në fushë bardhezinjtë.
Në emër të solidaritetit, fushata e nisur nga Juventusi, “Distanti ma Uniti”, vazhdon në mbështetje të Rajonit të Piemonte për blerjen e pajisjeve mjekësore dhe për mbështetjen e institucioneve të kujdesit shëndetësor e stafit mjekësor.
