Skuadra e Barcelonës nuk do të bëjë asnjë rezistencë nëse drejtuesit do të vendosin që për shkak të krizës nga koronavirusi të ulin pagën e futbollistëve dhe stafit. Presidenti Jozef Maria Bartomeu dhe kapitenët e ekipit kanë pasur biseda të gjata gjatë kësaj kohe dhe kanë gjetur gjuhën e përbashkët.
Lojtarët kanë bërë me dije se do ta mirëkuptojnë këtë veprim të skuadrës, i cili pritet të ndodhë jo vetëm te Barcelona, por edhe në skuadrat e tjera. Ndërprerja e kampionateve krijon probleme të shumta për të gjitha skuadrat, të cilat kanë si burim të ardhurash të drejtat televizive.
Por skuadrat e mëdha si Barcelona kanë humbje edhe në turizmin sportiv dhe drejtuesit u kanë thënë futbollistëve se kjo humbje është e parikuperueshme dhe është e pashmangshme ulja e pagës.
Por te Barcelona ka pasur gjithmonë mirëkuptim në këtë aspekt, pasi në verën e kaluar Xherard Pike doli përpara mediave dhe tha se lojtarët do të ulnin pagën e tyre nëse do të rikthehej Nejmari.
Kriza prej koronavirusit do të sjellë pasoja të rënda në sport, por lojtarët sigurisht që do të tregohen bashkëpunues për të ndihmuar ekipet e tyre.
