Njëzet vite pritje, por për të paktën një javë askush nuk do ta cenojë vendin e parë të Lacios në kampionatin italian, pasi Juvja dhe Interi, për shkak të shtyrjes së ndeshjeve të tyre, do t’i shohin nga poshtë.
Marshi i bardhekaltërve nuk u ndal as kundër Bolonjës, e cila ishte viktima e radhës e një sezoni për kornizë. 21 rezultate pozitive radhazi për ekipin e Simone Inzagit që fitoi tri pikë me vlerë në “Olimpico” falë golave të Luis Albertos dhe Korreas.
Falë këtij rezultati, kryeqytetasit kanë dy pikë avantazh ndaj Juves dhe 8 ndaj ekipit të Kontes që duhet të luajë dy ndeshje të prapambetura.
20 VITE – Lacio nuk shijon kreun e renditjes prej dy dekadash. Ishte 12 maji i vitit 2000 dhe ekipi nga Roma fitonte titullin e dytë të historisë së vet. Asokohe ekipi i Eriksonit fitonte 3-0 ndaj Rexhinës ndërsa Juvja rrëzohej në Peruxha.
Presidenti Klaudio Lotito nuk e ka parë thuajse kurrë ekipin e tij në të tilla kushte. Themi thuajse sepse Lacio ka qenë e para në javën e pestë të sezonit 2008-‘09 nën drejtimin e Delio Rosit dhe në 2010-‘11 me Edi Rejën në stol.