Të mbyllur në shtëpi. Të gjithë e pa përjashtim. Përfshirë edhe futbollistët më të paguar të globit që në kohë normale mund t’i lejojnë vetes çdo luks të imagjinueshëm. Në kushte shtëpie mundësitë kufizohen, e përveç stërvitjes, duhen gjetur mënyra për të kaluar kohën. E nëse disa lexojnë, të tjerë luajnë me videolojra apo qëndrojnë me familjen. Hobit janë të shumtë në fakt e po zbulojmë ato të disa prej emrave më të njohur të top këmbës.
Duglas Kosta
Braziliani është rikthyer në atdhe dhe atje ka rigjetur lirinë për të lëvizur, por për sa kohë ishte në Itali pati thënë se kohën e lirë e kalonte mes librave për t’u motivuar dhe Play Station-it. Ende e paqartë nëse motivohej për të luajtur në fushë apo nga televizori….
Ronaldinjo
Problemet me lirinë për 40 vjeçarin kanë nisur muaj më parë kur një gjykatë braziliane i konfiskoi pasaportën. Ronaldinjo nuk u ndal dhe shkoi në Paraguai ku u arrestua pasi paraqiti dokumente të rremë e tashmë është në paraburgim në pritje të gjyqi për falsifikim. Topi i ka hapur shumë dyer gjatë karrierës, por me mbylljen e saj, ish-fantazisti i Barçës nuk hoqi dorë nga dritat e projektorëve. Tashmë ai nuk mungon të ngjitet në skenë për të treguar aftësitë e tij vokale, pasi miq, Ronaldinjo tashmë preferon të këndojë më tepër se sa të luajë.
Teo Uolkot
Ka nga ata që lexojnë, por edhe nga ata që shkruajnë. Teo Uolkot adhuron të shkruajë, por jo romane. Sulmuesi me sa duket është shumë i aftë në krijimin e librave me përralla, një aktivitet që nuk kërkon shumë sforcim e që mund të bëhet në komoditet të plotë.
Zlatan Ibrahimoviç
Pasioni i suedezit për taekuondon është i njohur dhe me pak hapësirë mund të ushtrohet edhe në kushtet e shtëpisë. Jemi të bindur që vila e Ibrës në Malmoe ofron mundësi për të ushtruar edhe më shumë se vetëm arte marciale ndaj te Milani duhet të rrinë të qetë. Sulmuesi stërvitet e jo vetëm me top.
Andrej Arshavin
Prej dy vitesh ka varur këpucët në gozhdë dhe merret me pasionin e tij të vërtetë. Rusi nuk e ka fshehur kurrë që është shumë i dhënë pas veshjeve dhe modës, e tashmë duket se është stilist me kohë të plotë. Ajo që po bën në kohët e fundit, është specializimi në krijimin e veshjeve për femra dhe nëse Rusia vendos karantinën, atëherë 39 vjeçari do të ketë edhe më shumë kohë për të krijuar mbase ndonjë linjë të re.
Nejmar Jr
Sulmuesi i PSG është një fenomen në fushë, por edhe jashtë saj ka disa aktivitete në të cilat dallohet. Nuk po flasim për festat madhështore e as kërcimin, por për pokerin. Me sa duket ‘O Ney’ është një lojtar shumë i zoti me një tufë letrash në dorë e në këto ditë me siguri që do të ketë kohë për të kaluar më shumë kohë me pasionin e tij.