“Lega Calcio” ka një ide të re për të rifilluar sezonin e futbollit në Itali. Së pari, Kupa e Italisë, më pas Seria A. Kjo nënkupton që të luhet Juve-Milan dhe Napoli-Inter, së pari, të planifikuara fillimisht për në fillim të marsit, para pandemisë së “Coronavirus”, për të vendosur menjëherë finalistët e garës. Datat e zgjedhura në mënyrë indikative për dy gjysmëfinalet e kthimit, siç zbulon “Gazzetta dello Sport”, do të ishin 27 dhe 28 maj.
Shumë njerëz e pëlqejnë zgjidhjen, madje edhe në politikë, me ministrin Spadafora, i cili mund të jetë i kënaqur me dy ndeshje të transmetuara nga RAI, pra në domenin publik. Ristarti i Seria A mund të marrë kohë, veçanërisht nëse do të vendoset të luhej edhe finalja e Kupës së Italisë përpara rifillimit të kampionatit. Kompleksiteti i protokollit të Covid-19 ka të bëjë me rregullat, që duhen ndjekur. Pra, lojtarët më të mirë mund të rifillojnë me Seria A, e ndjekur më vonë nga Seria B dhe C, për t’u kthyer në normalitet vetëm kur të plotësohen të gjitha kushtet e sigurisë.
Ekziston edhe një datë për shtyrjen e gjithçkaje deri pas verës, 12 shtator. Me siguri do të ketë një protokoll të dytë për të përcaktuar masat e sigurisë që do të merren gjatë udhëtimit për të luajtur ndeshjet, të cilat përfshijnë jo vetëm futbollistët, por edhe zbatimin e ligjit, teknikët e TV-së, mjekët antidoping dhe figura të tjera.
Vendimi përfundimtar duhet të vijë nga Ministri i Shëndetësisë, Roberto Speranza, dhe nga ai i Sportit, Vincenzo Spadafora. Pa “ok” e tyre, futbolli nuk mund të vazhdojë.
