Ish-futbollisti dhe trajneri i Argjentinës, Jorge Valdano, i doli në mbrojtje Ronaldinho Gauchos pas peripecive që po kalon braziliani në Paraguai, ku u ndalua nga policia me akuzën e falsifikimit të dokumenteve.
Valdano, në shkrimin e tij në gazetën “El País”, me titull “Lëreni të qetë Ronaldinhon”, tha se “Ronaldinho u burgos për disa javë. Nëse niveli mesatar i krimit ishte ai i kryer nga Ronaldinho, e gjithë bota duhet të ishte një burg. Të jesh i trashë, siç e ka etiketuar avokati i tij, nuk do të thotë se je kriminel. Për futbollistët brazilianë jeta është gjithmonë një festë dhe futbolli, një lojë që e ekzalton jetën.”
Ronaldinho aktualisht ndodhet në një hotel në Paraguai në arrest shtëpie, pasi gjykatësi pranoi një garanci prej më shumë se një milion eurosh. Tashmë Ronnie dhe vëllai i tij janë në pritje të nisjes së gjyqit. Ata qëndruan rreth një muaj në një burg, në kryeqytetin Asunsion.
