Nuk ka futboll në periudhë pandemie, por çdo kohë është e mirë për të treguar anekdota të ditëve të izolimit. Gjatë një lidhjeje “live” në Instagram, Marcelo i tregoi partnerit të tij, Vinicius, një histori kurioze me Luka Modric. Anësori i majtë i Real Madridit rrëfeu atë që i ndodhi mesfushorit kroat pranë shtëpisë së tij, ditë më parë, me policinë:
“Luka ishte duke luajtur futboll me djalin dhe topi i ra në rrugë. Djali shkoi ta merrte, por e kapi policia, e cila i tha se do ta gjobiste për thyerje të karantinës, se kishte dalë në rrugë…” Këtë fakt, Marcelo ia kishte treguar me të qeshur, përmes telefonit.
Modric e kritikoi kolegun brazilian, që e bëri publike grindjen e tij të vogël me policinë, gjatë urgjencës së “Coronavirus”. Për fat të mirë, megjithëse Marcelo e tregoi, duket se historia mbaroi mirë dhe gjithçka mundi të sqarohej. Pra, në fund të fundit, nuk kishte gjobë për djalin e Modric.
