Humbje e rëndë për Mainzin në luftën për mbijetesë. Ekipi i drejtuar nga Beierlorzer nuk arriti të merrte qoftë një pikë në takimin me rivalin direkt, Augsburgun.
Në “Opel Arena” vendosi goli i shënuar nga Florian Niederlechner pa u mbushur një minutë lojë, finalizim që i mjaftoi Augsburgut për të marrë tri pikë qetësie në këtë transfertë delikate.
Në fakt, kur topi kaloi vijën fatale kishin kaluar vetëm 42 sekonda lojë, madje vetë protagonisti i këtij goli nuk po u besonte syve që kishte shënuar.
Futbollistët e Mainzit kërkuan të ndryshonin rrjedhën e lojës, por miqtë u treguan shumë të kujdesshëm, madje mund të kishin shënuar edhe gola të tjerë në momentet e kundërsulmeve, që nuk u shfrytëzuan si duhet nga sulmuesit.
Mainzi, pas kësaj disfate mbetet tri pikë larg zonës së ftohtë (31) dhe kërcënohet si nga Dusseldorfi ashtu edhe nga Werder Bremeni.
