Futbollistët e Kombëtares, po kalojnë një moment mjaft të mirë në karrierën e tyre, teksa janë shndërruar në protagonistë absolutë te skuadrat e tyre.
Kryesisht reparti difensiv, me lojtarë që luajnë në skuadra të rëndësishme të Serisë A. Duke filluar nga Strakosha, për të vazhduar te Gjimshiti, Hysaj, Kumbulla dhe Ismajli. Ky i fundit që aktivizohet te skuadra e Hajduk Splitet, pritet të bëjë hapim e madh në karrierë.
Për Ismajlin interesohen 2 skuadra italiane, bëhet fjalë për Beneventon, që sezonin e ardhshëm do të militojë në Serinë A si dhe Leçen, që është duke luftuar për të siguruar mbijetesën. Lajmi është konfirmuar nga trajneri Edi Reja, i cili në një prononcim për “Corriere dello Sport”, veç të tjerash është shprehur:
“Kumbulla është i përshtatshëm për mbrojtjen e tre personave. Jo vetëm që mund të mbrojë, por ai del dhe luan topin. E ardhmja e Shqipërisë mund të jetë e sigurt, unë kam Gjimshitin nga Atalanta, po shikoj dy ose tre lojtarë të tjerë të mundshëm. Është edhe Ismajli nga Hajduk Split, Benevento dhe Leçe po e kërkojnë. Me Kumbullën prapa ne jemi në vendin e duhur, kemi edhe Strakoshën në portë, të gjithë janë të rinj. Të tre qendrat janë aty, unë duhet të plotësoj pjesën tjetër të organikës”, ka thënë Edi Reja.