Riaftësimi nga një lëndim i rëndë afatgjatë nuk është detyrë aspak e lehtë për një futbollist dhe Marco Asensio ka përjetuar vuajtje të tilla në 11 muajt e fundit. Ylli i Real Madridit nuk arrin t’i mbajë dot lotët duke u rrëfyer për lëndimin.
Asensio, megjithatë, thotë se ndihet mirënjohës ndaj mjedisit në Real Madrid, i cili ia ka mundësuar ta kalojë periudhën më të vështirë në karrierë pas lëndimit në korrik të vitit 2019, transmeton Gazeta Express.
Fiks pas 11 muajve, Asensio u rikthye në fushën e lojës dhe atë në mënyrën më të mrekullueshme të mundshme, duke shënuar gol në prekjen e parë të topit, pas 23 sekondave, që përkon me numrin e fanellës së tij, dhe me asist në fitoren e Real Madridit 3:0 ndaj Valencias.
“Java e parë ishte shumë e vështirë. Vjen një kohë kur duhet ta tejkalosh lëndimin. Periudha më e vështirë janë javët pas operacionit, kjo është koha kur ndien dhimbje më së shumti”, trego Asensio.
“Isha i fiksuar pas riaftësimit dhe i kaloja 24 orë në ditë duke menduar për gjurin, gjë që është sfidë. Së pari u desh ta ulja inflamacionin, pastaj të ecja, pastaj t’i ushtroja këmbët. Kam punuar shumë dhe e kam tejkaluar këtë”, shtoi ai.
Me lot në faqe, ai nënvizoi: “Ndjeva shpresë, ngazëllim dhe liri kur vrapova përsëri”. /Gazeta Express/
