Ronald Kuman nuk fshihet më dhe e pranon se do të firmosë për Barcelonën. Nuk ka më asnjë dyshim se holandezi do të marrë drejtimin e klubit për dy vitet e ardhshme dhe të hënën në mbrëmje, administratori Oskar Grau ishte në Amsterdam ku mbylli marrëveshjen me federatën holandeze.
Kuman ka kontratë deri në fundin e vitit 2022, por në kontratën e tij ka pasur një klauzolë që mund të largohej nëse do ta kërkonte Barcelona. Në fakt, ditën e djeshme mediat kanë zbuluar se katalanasit duhet të paguajnë 4-5 milionë euro në drejtim të federatës së Holandës, në mënyrë që këta ta lënë të lirë. Më në fund erdhi ky shans dhe këtë herë nuk mund ta refuzonte. Kuman e ndien si detyrë që të ulet në stolin e skuadrës së zemrës dhe ta rimëkëmbë pas këtij sezoni të dështuar.
Nga dalja e zyrave të federatës holandeze, Kuman foli përpara kamerave të televizionit “NOS” dhe ishte i qartë. “Është momenti për të pranuar drejtimin e skuadrës së Barcelonës. Sigurisht që do të më pëlqente të isha trajner, por për momentin nuk mund të them asgjë. Nuk e kam hedhur ende firmën në kontratë. Mund të flasim sërish kur gjithçka të jetë 100% e sigurt. Duhet të presim edhe pak”, ka thënë trajneri holandez.
Kuman mbërriti pasditen e djeshme në Barcelonë për të firmosur kontratën e tij. Pas shkarkimit të Kike Setienit, skuadra e Barcelonës dhe drejtuesit e saj ishin të bindur se Kuman është njeriu i duhur për të nisur një projekt fitues. Ai e njeh mirë ambientin dhe i pëlqen të luajë me qarkullimin e topit. Klubi katalanas ka arritur një marrëveshje për 2 sezone me holandezin, por viti i tij i dytë është i varur nga zgjedhjet presidenciale. Ato do të mbahen më 15 mars dhe në rast se Bartomeu do të humbasë, e ardhmja e Kumanit është në rrezik.
