Do të jetë finalja e parë europiane e Interit, që nga epoka e “tripletës”, 10 vite më parë. Do të jetë një mundësi për të pasuruar vitrinën zikaltër me trofeun e parë të epokës “Suning”. Nga Kina, pronari i “Suning Tesco” dhe i Interit, Zhang Jindong, nuk e fshehu entuziasmin e tij: “Të gjithë shpresojmë që Interi të na bëjë përsëri të lumtur, duke fituar finalen e “Europa League”. Shpresojmë të jemi në gjendje të festojmë së bashku trofeun e parë, që kur “Suning” e bleu ekipin”.
Sikurse dihet, Interi nuk ka luajtur një finale europiane që prej “tripletës” historike, të fituar me Mourinho trajner, në vitin 2010. Do të ishte trofeu i parë i menaxhimit të “Suning”, i cili e bleu klubin zikaltër në qershor 2016.