Ish-futbollisti i Atletiko Madrid, Ignacio Kamaço, i ka dhënë fund futbollit të luajtur në moshën 30-vjeçare. Shkak për këtë vendim të vështirë është bërë një dëmtim i rëndë që futbollisti pësoi.
Bëhet me dije se 30-vjeçari ndjen dhimbje të mëdha te kyçi i këmbës së majtë dhe nuk mund të vazhdoj të luaj më. Edhe pse së fundmi provoi të stërvitej, ishte e pamundur, për të mposhtur këtë lëndim.
Pas disa operacioneve dhe trajtimeve mjekësore, Kamaço shpresoi të luante përsëri këtë verë, por dëmtimi e detyroi t’i vare përfundimisht këpucët në gozhdë.
Për sa i përket karrierës së tij, mesfushori spanjoll është aktivizuar përveç Atletikos edhe me Malagan dhe Volfsburgun. Së fundmi ai ishte pjesë e skuadrës gjermane, duke e mbyllur pikërisht te Volfsburgu. Ai gjithashtu ka mbajtur veshur edhe fanellën e kombëtares spanjolle.