Revolucioni që ka në plan Reali i Madridit duhet të presë ende. Nuk erdhi as verën që shkoi, por nuk do të vijë as këtë verë. Vjet nuk donte Zidan, ndërsa këtë herë janë kushtet ekonomike që e vështirësojnë. Në këtë situatë, trajneri francez do të “forcohet” vetëm me rikthimet e të huazuarve si Odegard dhe Lunin. Por Zinedin Zidan nuk trembet aspak dhe e di mjaft mirë si të fitojë edhe pa merkato të bujshme. Këtë e tregojnë shifrat. Tetë tituj nga 11 të fituar si trajner i Realit të Madridit i ka bërë vetëm me 70 milionë euro të shpenzuara.
Pra, mund të themi se Zizu nuk është trajneri që ka nevojë për shpenzime të çmendura për të fituar. Pasi fitoi Ligën e Kampioneve në verën e parë kur investimet ishin bërë për Rafa Benitezin, trajneri shpenzoi 30 milionë për rikthimin e Moratës nga Juventusi. Asensio u rikthye nga huazimi tek Espanjoli dhe Mariano Diaz ishte pjesë e të rinjve. Reali fitoi 4 trofe të tjerë si Superkupën e Europës, Botërorin e Klubeve, Champions-in dhe La Ligën.
Pas këtij sezoni u larguan lojtarë të rëndësishëm, si Hames, Pepe, Morata apo Danilo, por Zidan vazhdoi të ndiqte politikën e tij. Dy blerjet e tjera ishin Teo dhe Sebajos për 40 milionë euro, ndërsa të tjerët si Vajeho, Majoral dhe Jorente erdhën nga huazimet. Skuadrës iu bashkuan edhe Hakimi dhe Luka Zidan si talentet e akademisë. Zidan fitoi 4 trofe të tjerë të rëndësishëm dhe në total shkuan 8 tituj me 70 milionë euro të shpenzuara. Historia ndryshoi në sezonet pasardhëse, kur klubi bëri investime të shumta me blerjet e Militaos, Rodrigos dhe Hazardit. Zidan gjithashtu shpenzoi 100 milionë euro për Mendi dhe Joviç, por ky i fundit ka qenë një dëmtim.
Megjithatë, Zidan nuk u ndal së fituari dhe gjatë kësaj kohe ka çuar në palmaresin e Realit të Madridit 3 trofe të tjerë, 11 në total. Kjo verë do të jetë e vështirë në aspektin ekonomik, por Zidan nuk trembet.
“EKONOMISTI” ZIDANE/ Trajneri i Realit fiton 8 tituj me 70 milionë euro shpenzime
