Mesfushori i Breshias, Sandro Tonali ishte shumë pranë kalimit tek Interi, por papritur zikaltërit u tërhoqën dhe tashmë lojtari duket afër zyrtarizimit tek Milani. Presidenti i Breshias, Masimo Celino e pranon se Interi kishte arritur marrëveshje për Tonalin, por tregon se ato gabuan që u tërhoqën dhe se Milani di të vlerësojë paratë.
“Interi gaboi në të gjitha format me këtë operacion. Marota e kërkonte Tonalin, ndërsa Konte e admironte shumë lojtarin. Klubet e tjera nuk po ndërhynin fare, pasi e dinin që Interi kishte arritur marrëveshje. Me kalimin e kohës, Sandro po bëhej i paduruar për të zbuluar të ardhmen e tij. Tonali ka qenë që i vogël tifoz me Milanin, dhe jam i lumtur për të që do shkojë tek kuqezinjtë.
Milani di si ta vlerësojë paranë. Maldini është një profesionist i vërtetë dhe e ka AND-në e Milanit në gjak”, tha Celino për “Il Messagero”.
