Milan po vazhdon të fluturojë mes kampionatit dhe Europa League.
Skuadra e Pioli-t nuk po gabon asnjë ndeshje dhe tani ka filluar të mendojë edhe për titullin në Itali. Megjithatë, skuadrës i duhen disa përforcime për të luftuar deri në fund me të mëdhatë e tjera të Serisë A dhe Maldini me Massara-n mund të ndërhyjnë në janar për t’i shtuar armët në dispozicion të Piloi-t.
Objektivi i parë mbetet mbrojtësi i Fiorentina-s, Milenkovic. Klubi i Commisso-s e vlerëson 40 milionë euro serbin, por Milan synon të përfitojë një ulje, duke parë se qendërmbrojtësi nuk do ta rinovojë kontratën që skadon në vitin 2022.
Alternativa e kuqezinjve është një tjetër lojtar i Fiorentina-s, Pezzella, i ndjekur edhe në të kaluarën nga Maldini. Fiorentina kërkon 12-13 milionë euro për argjentinasin.
Një tjetër argjentinas tundon Milan-in. Bëhet fjalë për Mauro Icardi-n. Ish-ylli i Inter-it nuk po gjen shumë hapësira te PSG e Tuchel, me gruan menaxhere Wanda Nara që duket se i ka shkelur syrin Djallit pas derbit të fituar kundër skuadrës së Conte-s.
Icardi do të ishte pasardhësi perfekt i Ibrahimovic ose për të luajtur në krah të suedezit, deri në momentin që ky i fundit nuk do të vendosë t’i thotë lamtumirë futbollit.
