Partizani prej një dekade po vuan mungesën e terreneve stërvitore, duke bërë që të kuqtë të bredhin si çifuti në shkretëtirë për të gjetur një fushë për t’u stërvitur. Prej më shumë se katër vitesh klubi ka nisur ndërtimin e shtëpisë së re, e cila ka ngecur, në mënyrë që skuadrat e kuqe të kishin një adresë fikse për t’u stërvitur.
Trajneri Ilir Daja si kërkesë parësore ndaj drejtuesve ka pasur sigurimin e një fushe me bar natyral për stërvitjen e skuadrës. Pjesën më të madhe të përgatitjeve nën drejtimin e Dajës të kuqtë i kanë kryer në kompleksin “Pepa” në Elbasan apo në Ohër, ku kanë përdorur fusha me bar natyral.
Por, me hyrjen e stinës së vjeshtës, fusha stërvitore në Elbasan rëndohet nga reshjet, gjë e cila e ka detyruar ekipin e parë që përkundrejt dëshirës të spostohet në kompleksin “Football Republic”, që ofron fusha me bar sintetik. Për momentin, përgatitjet e skuadrës së Ilir Dajës janë në varësi të “kapriçove… të motit. Të hënën ekipi u stërvit në Elbasan, ndërsa dje, për shkak të motit të keq, u spostua në fushat me bar sintetik të kompleksit “Football Republic”.