Milan ka provuar shijen e humbjes për herë të parë në këtë sezon dhe e ka bërë në mënyrën më të keqe.
Kuqezinjtë kanë marrë një leksion futbolli nga Lille në javën e tretë të Europa League, duke u mundur 3-0 në shtëpi dhe duke humbur kreun e Grupit H.
Gjërat kanë filluar të shkojnë keq për vendasit nga minuta e 22-të, kur Romagnoli ka shkaktuar një penallti, që është transformuar nga Yazici.
Mesfushori turk 23-vjeçar ka ndëshkuar dy herë të tjera milanezët në minutat 55 dhe 58.
Goli i dytë ka ardhur dhe falë një gabimi të portierit Donnarumma, ndërsa i treti nga një përgjumje e mbrojtjes që ka harruar të kthehet mbrapa.
Yazici është lojtari i parë që realizon një tregolësh në fushën e Milan-it pas Rivaldo-s në tetorin e vitit 2000, me fanellën e Barcelona-s në Champions League.
Milan ka pësuar tre gola në shtëpi në një ndeshje europiane për herën e parë që nga nëntori i 2011-ës (humbje 2-3 kundër Barcelona-s).