Ronald Koeman falënderoi “fenomenin” Marc-Andre ter Stegen si më meritorin e fitores së ngushtë të Barcelonës 2-1 ndaj Dinamo Kyiv. Trajneri hollandez pranoi se skuadra e tij ka shumë për të punuar. Gjigandët katalanas bënë tri fitore në tri ndeshje të Grupit G të Ligës së Kampionëve, përmes penalltisë së Lionel Messit në minutën e 5-të dhe një goditjeje me kokë të Gerard Pique në pjesën e dytë. Sidoqoftë, Barça kishte nevojë për Ter Stegen, që bëri gjashtë pritje vendimtare kundër një kundërshtari të varfëruar (minimizuar) nga një shpërthim i koronavirusit në kampin e tyre.
“Ai provoi të jetë një portier i shkëlqyeshëm për ne, – tha Koeman për “Movistar”, pas ndeshjes. – Po stërvitej mirë pas dëmtimit dhe sot mundëm ta shohim në veprim. E filluam mirë ndeshjen dhe shpejt kaluam në epërsi 1-0, por nuk ishim në gjendje të gjenim golin e dytë dhe pastaj humbëm kontrollin. Falë Marc, i cili ka qenë fenomenal, arritëm ta mbanim kontrollin e ndeshjes. Ne duhet të luajmë më mirë dhe të përmirësojmë lojën pa top. Sonte nuk kemi bërë aq mirë. Në përgjithësi, kemi qenë të mirë në mbrojtje”.
