Pas fitores historike të Vllaznisë së femrave në UEFA Women’s Champions League ndaj kampioneve turke ALG Spor Kulubu me penallti, Presidenti i FSHF-së Armand Duka me një postim në rrjetin e tij social në “Facebook” përshëndeti ekipin e femrave të Vllaznisë pas kalimit të raundit të parë të UEFA Women’s Champions League. Duka shton se ishte një fitore e merituar për këtë ekip, por njëkohësisht edhe për rritjen e futbollit të femrave në Shqipëri:
“Jashtëzakonisht i lumtur me fitoren e sotme të Vllaznisë në turin e parë kualifikues të UEFA Women’s Champions League ndaj kampiones së Turqisë, ALG Spor Kulubu! Ka qenë një ndeshje vërtetë emocionuese dhe e luftuar deri në fund.
Një arritje e shkëlqyer për vajzat kuqeblu, por edhe për futbollin e femrave. Le të shpresojmë që ky sukses të pasohet nga të tjera triumfe dhe Vllaznia të avancojë në fazën e grupeve të Champions League për femra. Do të ishte një sukses i merituar për këtë ekip, por që njëkohësisht tregon se futbolli i femrave në Shqipëri është rritur në aspektin cilësor vitet e fundit. Urimet më të mira për drejtuesit e klubit, stafin teknik dhe shpresoj që Vllaznia të vazhdojë të jetë një burim frymëzimi për të gjitha vajzat që duan të luajnë futboll! Jemi krenar për ju!”, përfundon postimin e tij Presidenti i FSHF Armand Duka.
