Komisioni i Disiplinës në mbledhjen e sotme ka lëshuar dy paralajmërime për Tiranën dhe Bylisin. Ekipi bardheblu duhet t’i paguajë borxhin ish-trajnerit Ardi Mema, ndërsa ballshiotët duhet të derdhin para në llogarinë e KF Shkodrës për Qardakun.
- VENDIMET E DISIPLINËS – Pranimin e kërkesës së KF Shkodra. KF Bylis, për dështim në ekzekutimin e vendimit nr. 19 datë 30.01.2020, të Dhomës Kombëtare të Zgjidhjes së Konflikteve, në bazë të Nenit 62/1/a të KDS i jepet një afat paralajmërues prej 30 (tridhjetë) ditëve për të ekzekutuar vendimin.
- Pranimin e kërkesës së kërkuesit Ardian Mema. KF Tirana, për dështim në ekzekutimin e vendimeve nr.22 datë 07.07.2020 dhe nr. 22/1 datë 08.09.2020, të Dhomës Kombëtare të Zgjidhjes së Konflikteve, në bazë të nenit 62/1/a të KDS i jepet një afat paralajmërues prej 30 (tridhjetë) ditëve për të ekzekutuar vendimet”.
Ardian Mema kërkon 24 milionë lekë nga klubi i Tiranës. Ai nuk ka marrë paratë që i takojnë pas largimit nga stoli dhe për këtë arsye i është drejtuar FSHF. Bylisi nga krahu tjetër duhet t’i paguajë 3 milion lekë të vjetra KF Shkodrës për futbollistin Eridon Qardaku.
