Pas mbrëmjes së “Golden Boy”, ku u shpërndanë mjaft çmime, një ndër skenat që bëri më shumë përshtypje dhe u shpërnda në rrjetet sociale ishte ajo kur Mino Raiola përshëndeste presidentin e Juves, me këtë të fundit që i bënte gjestin e telefonit.
Dhe kjo thirrje në celular që Andrea Anjeli i kërkonte menaxherit italian u interpretua si një kërkesë për bisedime për çështjen “Pol Pogba”. Dhe fakti që gjatë gjithë kësaj jave, ashtu sikurse edhe dje, Raiola është parë sërish në Torino, bën të mendohet se diçka po zien. Madje, rikthimi i mundshëm i Pogbasë te Juventusi po diskutohet deri në Amerikë. Rrjeti “ESPN” nënvizon se “Zonja e Vjetër” ka bërë edhe ofertën e radhës, duke i ofruar Junajtidit kartonin e Dibalës dhe huazimin e Bernardeskit.
