Zinedin Zidan ka ndryshuar “formulën” për Realin e Madridit. Tashmë nuk ka vetëm një formacion tip (8 lojtarë kanë qenë titullarë gjithmonë në 4 ndeshjet e fundit). Zizu ka ndryshuar edhe strategjinë e zëvendësimeve. Rregullorja e FIFA-s i ndihmon skuadrat duke parë kalendarin e ngjeshur që të bëjnë 5 zëvendësime. Por trajneri francez i Realit të Madridit ka vendosur që t’i “injorojë” këto zëvendësime dhe në katër ndeshjet e fundit ka 2.25 zëvendësime për ndeshje. Ai ka bërë një zëvendësim me Sevijen, dy me Gladbahun dhe tri me Atletikon e Madridit dhe Bilbaon.
Vetëm Marko Asensio është aktivizuar në të gjitha këto ndeshje si zëvendësues dhe ndiqet nga Rodrigo, i cili u fut në fushë kundër Atletikos dhe Bilbaos. Përveç tyre, ka tre futbollistë që janë aktivizuar në pjesën e dytë të ndeshjeve nga një herë. Arribas luajti ndaj Gladbahut, Valverde u fut me Atletikon e Madridit dhe Isko kundër Bilbaos. Zëvendësimi më interesant ishte kundër Gladbahut, ku trajneri Zidan preferoi Arribasin përpara Iskos, i cili qëndroi në pankinë gjatë 90 minutave.
Kur u pyet për këtë gjë, Zidan tha se nuk ka ndërmend të bëjë zëvendësime kot. “Është e vërtetë që nuk kam bërë zëvendësime. Nuk do të ndryshoj sa për të ndryshuar, por i shoh mirë 5 zëvendësimet me këtë kalendar të ngjeshur që kemi”, ka thënë Zidan. Ai është në favor të 5 zëvendësimeve, por në realitet nuk i bën ato. Kurtua, Vaskez, Varan, Mendi, Kros, Modriç, Vinicius dhe Benzema kanë qenë titullarët e tij të paprekshëm. Ramos, Karvahal dhe Kasemiro kanë humbur ndonjë ndeshje për shkak të dëmtimeve apo kartonëve, por kurrë për vendim teknik të trajnerit.
