Kampionia e Francës, PSG-ja, konfirmoi zyrtarisht pas 5 ditësh shkarkimin e teknikut gjerman Tomas Tuhel. Në një komunikatë për shtyp, nënkampionët e Europës konfirmuan mbylljen e kontratës me 47-vjeçarin.
Shkarkimi i tij u konfirmua paraditen e 24 dhjetorit, disa orë pas ndeshjes së kampionatit francez me Strasburgun, e fituar nga parizienët 4-0. Sot, në kanale zyrtare, PSG-ja pranoi mbylljen e bashkëpunimit me ish-trajnerin e Borusia Dortmundit.
Tashmë, pritet të merret vendimi për trajnerin e ri. Favorit shikohet ish-trajneri i Totenhemit Mauricio Poçetino.
Tuhel u shkarkua pas kritikave që bëri ndaj klubit në një media gjermane për politikat e ndjekura në ndërtimin e skuadrës me superyje dhe pamundësinë e të ushtruarit të profesionit të tij. Drejtori i klubit Leonardi i komunikoi gjermanit shkarkimin pas ndeshjes së Ligës 1.