Interi dështoi sërish të kalojë fazën e grupeve në Ligën e Kampioneve, teksa me barazimin e marrë ditën e djeshme ndaj Shahtjor Donjetskut, mbeti në vendin e fundit të grupit B, duke mos siguruar dot sa Ligën e Europës.
Zikaltërit e kishin mundësinë për të mposhtur skuadrën ukrainase, sidomos në minutat e fundit. Ishte minuta e 89, kur Sançez merr një krosim të shkëlqyer nga Eriksen nga goditja e këndit dhe godet menjëherë bukur me kokë, por kur të gjithë interistët u bënë gati për të festuar, Lukaku i ngriu buzëqeshjen të gjithëve.
Belgu i ndodhur pranë portës kundërshtare, shfaqet në pozicion jashtë loje dhe ndal me kokë gjuajtjen e Sançezit, e cila me shumë mundësi do ndalej në fundin e rrjetës.
Sigurisht kapja e topit nga Lukaku ishte e paqëllimshme, por duket se fati i keq e ndjek belgun, pasi edhe në finalen e Ligës së Europës ndaj Sevijës, u bë protagonist, duke shënuar një autogol, në tentativë për të larguar topin.