Erling Haland po kalon një moment të mirë në Dortmund, edhe pse kjo vetëm në planin personal. Norvegjezi renditet i treti në listën e golashënuesve dhe vazhdon të shënojë për verdhezinjtë pothuajse çdo ndeshje. Nuk mund të themi të njëjtën gjë për ecurinë e Borusias e cila ka lënë shumë për të dëshiruar në ndeshjet e fundit. Mediat gjermane shkruajnë për një krisje të Halandit me skuadrën verdhezi pasi sulmuesi në ndeshjen e fundit ndaj Hofenhaimit është larguar i pakënaqur nga shokët e tij.
Haland nuk është i lumtur te Borusia pasi nuk po ndihmohet nga skuadra aq sa ai po ndihmon skuadrën. Largimi i tij në fund të sezonit bëhet edhe më i mundshëm pas këtyre javëve. Të interesuar për nordikun janë skuadra të mëdha, si Real Madrid, Barcelona dhe Mançester Siti. Agjenti i lojtarit, Mino Raiola, është gati të negociojë me cilëndo skuadër që mund të paguajë shumën e kërkuar nga agjenti. Vlera e Erling Halandit në “transfermarkt” është 110 milionë euro.
