Klaus Gjasula është një tjetër sinjal pozitiv për Kombëtaren. Kur duhet një muaj nga grumbullimi për tri ndeshjet e marsit, mesfushori i Kombëtares së fundmi ka shtuar ritmet në stërvitje. Mesfushori i Hamburgut kaloi një dëmtim të rëndë në gju, por që fatmirësisht nuk ishte e nevojshme që të kryente operacion. Së fundmi, Gjasula ka zbritur në fushën stërvitore me skuadrën e Hamburgut duke shtuar ritmet.
Lojtari vijon që të punojë me program individual, por lajmi i mirë është që nga dita në ditë ai rrit ngarkesën dhe shton ritmin, çka e lë të hapur mundësinë që deri në javën e tretë të marsit, mesfushori të jetë i rikuperuar për të qenë një alternativë cilësore në dispozicion të trajnerit Reja për sfidat ndaj Andorrës (25 mars), Anglisë (28 mars) dhe San Marinos (31 mars).
