Mesfushori i Vllaznisë , Arsid Kruja, ka folur para ndeshjes me Apoloninë në kampionat, e cila do të zhvillohet ditën e nesërme. Kruja ka thënë se fierakët nuk duhet të quhen si një ekip i lehtë, duke shtuar më tej se Vllaznia luan vetëm për fitore dhe nga e kaluara ka treguar se dinë të ringrihen.
“Normalisht që jo vetëm ne, por i gjithë qyteti, gjithë Shkodra, kërkon fitoren për të arritur tek objektivi. Besoj se do ia dalim që të fitojmë nesër.
Nuk mund të them se Apolonia është kundërshtar i lehtë, pasi duhet një vlerësim maksimal për çdo skuadër. Ndaj secilit kundërshtar ne japim maksimumin dhe duhet të marrim pikët e plota.
Humbja me Laçin nuk ishte një rezultat që e prisnim, por ne kemi treguar që dimë të ringrihemi. Do tentojmë ta kalojmë nesër me fitore.
Problemet e së kaluarës? Nuk mund ta quaj dëmtim, sepse nuk ishte fizik. Kam kaluar një gjendje gripale dhe tani jam shumë mirë dhe kërkoj të bëj maksimumin për Vllazninë”, tha Kruja.