Atalanta fitoi këtë fundjavë 5-1 me Krotonen, ku Berat Gjimshiti krahas paraqitjes pozitive në prapavijë shërbeu edhe me një asist në golin e dytë të bergamaskëve.
Mirëpo, në pjesën e parë, mbrojtësi i Kombëtares alarmoi jo pak Atalantën. Pas një përplasjeje në fushë, u krijua ideja e një dëmtimi të rëndë në hundë për shqiptarin. Rreziku fillestar mund të ishte i një frakture në hundë, ç’ka do të sillte një sërë problemesh për qendërmbrojtësin përpara sfidave me Interin më 8 mars si dhe me Real Madridin në Champions një javë më vonë.
Mirëpo dje, pas ndeshjes, për mbrojtësin kanë dalë edhe rezultatet e kontrolleve dhe fatmirësisht nuk bëhet fjalë për frakturë në hundë, çka përjashton mungesën e gjatë dhe pritet që Gjimshiti të jetë në dispozicion të Gasperinit të hënën, për sfidën ndaj Interit në Serinë A.
