Dy penallti të mohuara dhe një karton i kuq i padhënë. Ky është bilanci i gjykimit të djeshëm në Kukësi-Teuta 0-2.
Pamjet filmike “ngelin në klasë” arbitrin kryesor Erjon Bastari, i cili nisi të gabonte që në minutën e 37-të, kur Asion Daja bëri një ndërhyrje horror ndaj Agim Ibraimit. Bastari u mjaftua me një karton të verdhë ndaj mesfushorit të Teutës, por intensiteti i ndërhyrjes ishte në limitin e një të kuqi, por mesfushori i Teutës u fal.
Ndërsa në minutën e 78-të, Gruda i durrsakëve dribloi në zonë Kotobellin, por ky i fundit e pengoi. Bastari vijoi lojën, por kemi të bëjmë me penallti të padhënë për Teutën.
Ndërsa në minutën e 81-të mungon një 11-metërsh për Kukësin, teksa Hoxha ndërhyn në mënyrë të gabuar ndaj Kotobellit.