Stërvitja e djeshme e Partizanit ka nisur shumë më ndryshe se ditët e tjera. Lojtarët e kuq, të pakënaqur për vonesat e rrogave, kanë refuzuar të stërviten për afro gjysmë ore, duke kërkuar sqarime nga drejtuesit për vonesat e pagave.
“Panorama Sport” zbulon nga burime të sigurta, se kjo situatë e pazakontë në shtëpinë e të kuqve, ka vënë menjëherë në lëvizje klubin, teksa vetë drejtori Olsi Rama ka mbërritur urgjentisht në kompleksin stërvitor. Mësohet se ai ka qetësuar lojtarët dhe njëkohësisht i ka garantuar për anën financiare.
Pasi kanë biseduar pak minuta me drejtorin, lojtarët kanë vazhduar normalisht përgatitjet nën drejtimin e Ilir Dajës. Ndërkohë, gazeta ka kontaktuar mbrëmë me zyrën për shtyp të klubit të kuq lidhur me këtë çështje, por nuk mori një sqarim zyrtar për atë që ka ndodhur.
