Paolo Skaroni ka dhënë dje një intervistë për “Il Foglio Sportivo”. Presidenti i Milanit ka komentuar javën e cila për shkak të Champions-it dhe largimit të Donarumës ka marrë një rëndësi të veçantë.
VENDI I DYTË – “Në buxhet kishim parashikuar një renditje në vend të gjashtë, ndaj jemi shumë të entuziazmuar për arritjen e një vendi në Champions. Në dimër ishim të parët, ndaj në atë moment u rrit vetëdija se kishim cilësi për të bërë diçka më tepër”.
NJERËZIT KOPERTINË – “Kemi shumë simbole të sezonit tonë. Maldini, Pioli, Gazidis dhe ekipi bënë diçka të jashtëzakonshme. Këtë e dëshmojnë 13 pikët më shumë sesa sezoni i kaluar. Jemi të gjithë të rëndësishëm, por asnjëri nuk është i pazëvendësueshëm”.
SUPERLIGA – “Është një projekt i varrosur tashmë, por autoritetet përkatëse nuk duhet të anashkalojnë problemet financiare në të cilat ndodhet futbolli, sidomos pas pandemisë”.
MALDINI – “Ne të gjithë duhet të mësojmë dhe të përmirësohemi, Paolo po bëhet gjithnjë e më shumë një menaxher ndërkombëtar dhe ai po e bën shumë mirë profesionin e ri në të cilin është kredhur”.
DONARUMA – “Nuk mendoj se Milani dëshiron t’i japë mësime ndokujt. Klubi përpiqet të bëjë punën e tij dhe ne jemi të vëmendshëm ndaj pasqyrës sonë të të ardhurave. Nuk mund t’i përmirësoj fjalët e Maldinit të një dite më parë. Pozicioni i tij është i imi”.
