Teuta ka vijuar dje përgatitjet në prag të ndeshjes së fundit të kampionatit kundër Apolonisë, që do të luhet nesër në orën 17:00 në stadiumin “Niko Dovana”.
Në fillimin e seancës së djeshme, trajneri Edi Martini u foli futbollistëve për specifikën e ndeshjes me Apoloninë, ku jo vetëm duhet fitorja, por mund të kërkohet edhe një rezultat i thellë, në varësi kjo edhe të ndeshjes Vllaznia-Laçi.
Trajneri pritet të bëjë ndryshime në formacion, pasi titullari i mesfushës, Albano Aleksi, mungon në këtë takim për shkak kartonësh. Në luftën për një vend në mesfushë është Karabeci dhe Avdyli. Ndërkohë, në repartin e sulmit ka një balotazh mes Grudës dhe Krasniqit.
